#أ_ب_تسويق_رقمي: (2) إزاي تعمل Online Marketing Plan؟

 #أ_ب_تسويق_رقمي: (2) إزاي تعمل خطة تسويقية "Online Marketing Plan"؟



واحدة من أهم الحاجات اللي هتميزك عن كل اللي شغالين في السوق في مجال ال Digital Marketing هو إنك تكون بتعرف تعمل Plan تشتغل على أساسها، كتير موجودين في السوق ما شاء الله متميزين جدا في استخدام ال Tools لكن تيجي تطلب منه مثلا يعمل لك حملة تسويقية Marketing Campaign عن عيد الأم مثلا لل Brand بتاعك بتلاقيه فتح بقه وبلّم وما بقيش عارف يعمل إيه :$ ... والله أنا فاكر إني لما روحت إنترفيو قبل كدة وإتقبلت فيه بفضل الله، صاحب الشغل قال لي: "أنا عارف إن إنت لسة خبرتك مش كبيرة في السوق، بس أنا شايف فيك Potential مش شايفه في كل اللي قدموا، بصراحة أنا بأشتري دماغك" ^_^

إن شاء الله تعالى في مشاركة النهاردة هنحاول نتعرف على إزاي تعمل خطة تسويقية رقمية متكاملة "Online Marketing Plan"، ونشوف مثال لخطة تسويقية عملتها قريب، يللا نبدأ على بركة الله ;)
إيه أفضل طريقة أفكر إني أعمل بيها ال Plan بتاعتي؟
يمكن من أفضل ال Mechanism اللي تقدر تفكر بيها عشان تعمل بيها ال Plan بتاعتك واللي إشتغلت عليها في المثال اللي هنتعرض له بعد شوية، هي طريقة "SOSTAC" وهي إختصار للكلمات والخطوات دي:
  1. Situation Analysis: وهنا بنحاول نعرف إحنا وضعنا إيه بالظبط ووضع شركتنا وده بنعرفه بسهولة جدا بتطبيق مبادئ SWOT, PEST اللي كنا اتكلمنا عنهم قبل كدة، يعني بدراسة ال Micro- & Macro-Environment اللي بيأثروا على السوق وعلى الشركة نفسها
  2. Objectives & Goals: هنا بنحاول نحدد الأهداف اللي إحنا عاوزين نحققها، واللي هي غالبا بتبقى يا إما Business Goals أو Marketing Goals واللي بيكونوا مرتبطين بال Vision, Missions بتاعة الشركة ومبادئها وغيره (كمثال نفسنا شركتنا كل الناس تعرفها وتسمع عنها "Brand Awareness"
  3. Strategies: ودي الطرق اللي هنمشي عليها عشان نحقق الأهداف دي، واللي غالبا بتبقى متعلقة أكتر بال Technology (زي مثلا إننا نعمل حملات مدفوعة عشان نحقق الهدف ده "Establishing Campaigns")
  4. Tactics: إيه هي الخطوات اللي هنعملها بالتفصيل عشان ننفذ الطريقة اللي إختارناها (زي مثلا إننا نبدأ حملة باستخدام برنامج Google AdWords ونعمل إعلانات على ال Search Engine)
  5. Actions: دلوقتي محتاجين نعرف مين هيعمل إيه؟ وإمتى؟ ... بمعنى أبسط محتاجين نوزع المهام اللي طلعنا بيها ونخليهم يبدأوا يشتغلوا عليها وينفذوها فعلا
  6. Control: أخيرا محتاجين أكيد نتأكد إن الشغل اللي بنعمله مظبوط، والمرحلة دي بنراجع فيها على ال Consistency بين ال Objectives, Strategies, Tactics زي ما هو واضح في الصورة

 وإذا ركزتوا شوية في الطريقة دي هتلاقوها برده Plan > Execute > Monitor اللي كنا اتكلمنا عنهم قبل كدة *_^

 طيب إزاي أعمل ال Plan بقى؟ :D
تعالوا نبدأ على بركة الله بإننا نتكلم عن Brand مشهور جدا، هو Lactel، كان مطلوب مني، كـ Assignment في واحدة من الوظايف اللي كنت مقدم فيها، إني أعمل له Social Media Strategy لشهر رمضان، بحيث إني أعمل Editorial Calendar لمدة أسبوع (3 أيام قبل رمضان، و3 مع بداية رمضان)، وأجيب Engagement Idea تـ Go Viral طول الشهر ... صلوا على حضرة النبي، وتعالوا نشوف أنا عملت إيه!! :)
  • Brand Identification
    •  أخدت أكتر من يوم كامل تقريبا بأتعرف على ال Brand ... دخلت ع ال Website بتاعهم، شوفت المنتجات وخدمات الشركة وكدة، وبصراحة ما لقيتش معلومات كتير ف الموقع بتاعهم ... فقولت أشوف الدنيا إيه في ال  Social Media والحمد لله كان في شغل حلو على صفحتهم ع الفيس وتقسيم للدنيا وكدة، كمان القناة بتاعتهم ع اليوتيوب شوفت الفيديوهات بتاعتهم والإعلانات الأخيرة ليهم، وده خلاني كونت فكرة كويسة عنهم، الحمد لله.
  • Target Audience
    • هنا بقى بدأت أفكر يا ترى مين ال Audience اللي ممكن نشتغل معاهم، ومن خلال الصورة اللي إتكونت عندي بعد ما أخدت فكرة كويسة عنهم، لقيت إن ال Target Audience بتوعنا هنا هما: الأطفال والأمهات ... بس كان فيه حاجة ملفتة للنظر، إحنا في رمضان، وهأرجع للجزئية دي بعدين، وكل الناس بتحب تاكل زبادي ع السحور في رمضان، فهنا الشريحة بتاعتنا، في الوقت ده، بقيت أكبر وأوسع من الوضع العادي.
  • Competitors
    • بدأت بقى أشوف الشركات المنافسة للشركة بتاعتنا، فلقيت عندي جهينة، دانون، المراعي ... برده أخدت وقت بس مش كبير قوي أشوف المنتجات بتاعتهم وإيه الجديد عندهم عشان أتأكد إن الأفكار اللي هأوصلها ما تبقاش شبه أفكارهم، كمان عشان أتعلم منهم وأشوف هما بيفكروا إزاي، واستفدت منهم جدا بصراحة
  • Time
    • الوقت عندنا هنا مميز جدا، وهو شهر رمضان المبارك ... ويمكن زي ما وضحت قبل كدة إن المنتجات بتاعتنا برده ليها علاقة كبيرة بشهر رمضان لإن كل الناس بتاكل زبادي ع السحور، ورغم إنها ميزة إلا إنها عيب في نفس الوقت لأن التنافس فيها كبير قوي ولازم فكرة تكون مميزة وإبداعية.
  • Ideation
    • بدأت بقى أهم مرحلة وهي مرحلة ال Brainstorming، وهنا بقى كنت كل لما تيجي لي فكرة أيا كانت حلوة أو وحشة كنت بأكتبها وأسجلها عشان ما أنسهاش، كنت بأسأل الناس ع أفكار وأتناقش معاهم فيها، أخد الموضوع معايا وقت كبير ... بعدين رحت قعدت أراجع الأفكار دي وأنقحها عشان أطلع منها الأحسن.
وكان نتاج الرحلة الطويلة دي اللي امتدت لأكتر من 3 أيام، الخطة دي، أتمنى تقروها وتقولوا لي رأيكم فيها ومنتظر أشوف تفاعل منكم على الطريقة دي ورأيكم فيها :)

طيب، تعالوا نشوف بقى الكلام ده كتطبيق عملي
هنا إحنا إشتغلنا على إننا نعمل خطة تسويقية متكاملة لشركة AwfarMarket في فترة شهر رمضان والصيف الجاي، اشتغلت عليها بفضل الله تعالى أنا ومجموعة الطلبة اللي كنت درست لهم في منحة وزارة الإتصالات MCIT ...
تقدر تشوف الفيديو من هنا: https://youtu.be/RSdlTdOVxyc


 وعشان اللي محتاج تفصيل أكتر عن طريقة ال SOSTAC ممكن يرجع للملف ده في تفاصيل كويسة جدا


 وبكدة تبقوا جاهزين إن شاء الله تعالى إنكم تعملوا ال Online Marketing Plan بتاعتكم، ياترى هتعملوها على Brand إيه؟ ^_^

تعليقات

إرسال تعليق