#أ_ب_تسويق_رقمي: (0) يعني إيه تسويق رقمي "Digital Marketing"؟
ناس كتير بدأت في الفترة الأخيرة يسمعوا عن مجال ال Digital Marketing ( وأنا كنت واحد من الناس دي بصراحة من سنتين، رغم إني شغال فيه ليا أكنر من 3 سنين :D ) وبقى عندهم شغف كبير إنهم يتعلموا المجال ده ويشتغلوا فيه ... لكن دايما بيكون السؤال: "أبدأ إزاي؟!" :) ... وما أخبيش عليكم على قد ما إجابة السؤال ده سهلة على قد ما هي صعبة في تنفيذها، لإن المجال كبير جدا، ولو انت من البداية مش هتتعب وتدور على المعلومة، أكيد مش هتقدر تكمل فيه، لاسيما ( حلوة لاسيما دي :D ) إن أي مجال تقني، وخصوصا ال e-Marketing، هتلاقي فيه كل لحظة جديد مش بس كل يوم ;) ... تعالوا نبدأ ع بركة الله نتعرف على المجال وإيه اللي إنت محتاج تعرفوا فيه ...
مبدأياً، يعني إيه Digital Marketing؟
المجال زي ما حضراتكم عارفين إسمه، تسويق رقمي "Online / Digital Marketing" وده معناه إن فيه عندنا مجال تاني ممكن نسميه Offline Marketing، والفرق بينهم باختصار شديد دون الدخول في التفاصيل: "هو إني في حالة ال Online Marketing هأعمل Marketing (يعني تسويق للخدمات أو المنتجات) لكن باستخدام ال Online Tools" ... كمثال وبمعنى أبسط، إنت في ال Offline هتعمل تصميم لبانر عشان تحطه على Billboards على الطريق الدائري مثلا، في ال Online هناخد نفس التصميم ده ونحطه على الصفحة بتاعة الشركة على الفيسبوك، بس آدي الموضوع ببساطة ^_^ ...
برده مش فاهم إيه الاختلافات اللي بينه وبين التسويق العادي؟ بمعنى محتاجينه ليه؟ :\
مفيش حد يقدر ينكر إن الثورة التكنولوجية اللي إحنا فيها دي أثرت بشكل كبير جدا على سلوك المستهلكين ... وأكيد في إختلافات كبيرة جدا بين التسويق الرقمي والتسويق العادي لأي بيزنس، يمكن من أهما: أي حاجة هتعملها في ال Marketing Activities بتاعتك أونلاين، هتبقى متاحة للناس 24 ساعة/7 أيام، وبرده متاحة للعالم كله من خلال قنوات التسويق الرقمي بتاعتك (وأهمهم الويب سايت بتاعك)، كمان الإعلانات هنا هتبقي موجهة "Targeted" لناس بعينهم زي ما هنعرف بعدين، وبتبقى تكلفتها معقولة جدا مقارنة بالتسويق العادي، وأخيرا إن كل شغلك بيبقى قابل للقياس "Measurable" يعني تعرف إذا كنت بتحقق نجاح ولا لأ! ... كل دول أكيد هيساعدوك إنك تحقق أهم هدفين عندك في التسويق وهما: جلب عملاء جدد "Customer Acquisition" وإنك تحافظ على العملاء الحاليين "Customer Retention" :)
طيب، إيه الأهداف اللي أقدر أحققها من خلال التسويق الرقمي؟
تقدر تحقق من خلال التسويق الرقمي الآتي:
- Brand Awareness: ممكن يبقى عندك أحسن منتج في التاريخ، بس لو ما قدرتش تعرف الناس بيه مش هتقدر تبيعه
- Communications: بإننا نحاول نوجد وسائل تواصل مختلفة مع العملاء بتوعنا
- Connections: بإنك تبدأ تبني علاقات محترمة مع العملاء بتوعك
- Delivering Services: ممكن تقدم خدمات ومنتجات كتيرة أونلاين بدون حتى ما يكون عندك Stores مثلا، وده يمكن واضح جدا في حالة ال E-Commerce Systems
- Increasing Sales: أكيد هتكون حابب برده إنك تزود مبيعات شركتك من خلال الشغل اللي بتعمله أونلاين
ممتاز، إيه بقى فروع المجال ده؟ يعني إيه اللي المفروض أعرفه عنه؟
زي ما قولنا المجال كبير جدا وفي تخصصات كتيرة، وعشان تفهمها محتاجين تفصيل كل نقطة منها لوحدها وده اللي هنحاول نعمله بإذن الله في المشاركات اللي جاية، تعالوا نتعرف ع المجال:
- Website: أهم Channel عندك واللي لازم تعتني بيها هي الويب سايت بتاعك، لإنه ببساطة المكان الوحيد اللي تقدر تعمل فيه كل اللي إنت عاوزه وتعرف الناس بشركتك، ببساطة عامل زي الشركة بتاعتك اللي ليها مباني لكن أونلاين، والمفروض إنك تخللي كل القنوات الباقية تصب فيه لإن هو الأساس عندك.
- Content Marketing: أهم حاجة في شغل التسويق بتاعك هي الرسايل اللي عاوز توصلها للعملاء بتوعك، وفي جزء من المجال ده خاص بتسويق المحتوى الرقمي.
- Social Media Marketing: مفيش إختلاف إن السوشيال ميديا وسيلة مهمة جدا للتواصل مع العملاء بتوعك، ويمكن من أشهر المواقع اللي ممكن تعمل عليها تسويق لشركتك: Facebook, Twitter, LinkedIn, Instagram, Google+, YouTube, Pinterest وغيرهم كتير.
- SEO, SEM: دول تقنيات أساسية بنستخدمهم عشان نخللي الموقع بتاعنا يظهر على نتايج البحث الأولى، سواء كانت مدفوعة (Search Engine Marketing) أو غير مدفوعة (Search Engine Optimization) ودول فيهم كلام وتفصيل كبير هنرجع له بعدين
- Online Advertising: إزاي تعمل حملات إعلانية مدفوعة لشركتك عشان تحقق الأهداف بتاعتك
- E-Mail Marketing: واحدة من أهم وسائل التسويق المباشر "Direct Marketing" لإنك هنا بتوصل للعملاء بعينهم
- Mobile Marketing: كل الناس دلوقتي معاها موبايل وفي طرق كتيرة ممكن تستهدف بيها العملاء بتوعك عن طريق الموبايل
- Web Analytics: مش معقول هتعرف إنت بتحقق نجاح في شغلك أونلاين من غير ما تقيس النجاح ده، وده بيكون من خلال مجموعة كبيرة من المعطيات والتقارير اللي بتوضح وضع شركتك.
رائع، مين بقى اللي المفروض يدرس المجال ده؟ :)
أنا من رأيي كل الناس :D ... لكن أكيد أي حد نفسه يشتغل في المجال ده وياكل منه عيش :D ... وبرده أي حد عنده بيزنس والميزانية بتاعته "Budget" محدودة ... وأخيرا أي حد فاهم إن الناس دلوقتي بقت تحب تدور على المعلومة وتشتري أي حاجة أو تاخد خدمة أونلاين وبدأ يتغير سلوكهم ويبعدوا عن وسائل التسويق القديمة، فالبديل أكيد هو التسويق الرقمي ;)
آخر سؤال طيب :D ... هل محتاج أكون درست Marketing عشان أتعلم Online Marketing؟
هو الأفضل طبعا يكون المفاهيم واضحة معاك عشان تحاول تربط المواضيع كلها ببعضها، وما تقلقش أنا هأديلك الـ Brief في رغيف إن شاء الله :D ...
حاجة أحب أختم بيها وياريت تحطوها حلقة في ودنكم طول السلسلة دي وما بعدها إن شاء الله تعالى في شغلك في مجال ال Online Marketing ...
"Think LESS about the TECHNOLOGY, and MORE about the PSYCHOLOGY"
تعليقات
إرسال تعليق