ال Startups علينا حق! :)
مفيش حد بيحاول يشتغل ويحقق ذاته إلا لما بيكون بيحلم إنه يشتغل في شركة كبيرة زي Google أو Microsoft مثلا، بس ده غالبا ما بيحصلش، وبتبقى محتاج تتمرمط بتاع 10 سنين ع الأقل عشان توصل للشركات دي :\ ... وغالبا بيبقى قدامك إختيار من إتنين: يا إما تشتغل في Startup وتجتهد عشان تكبر، أو تبدأ إنت ال Startup بتاعتك أصلاً! ^_^ ... في المشاركة دي إن شاء الله هأحكي لكم عن تجربتي الشخصية واللي شملت التلاتة دول، فركزوا معايا! :) ... بس قبل ما أبدأ إنتواعارفين إني كلامي كتير، اللهم بلغت :D كمان في مفاجئة حلوة في آخر المشاركة دي، فياريت تقروها كلها عشان تعرفوا تربطوا الكلام ببعضه ;) ... نبدأ على بركة الله :)
أولا: الشركات الكبيرة Corporate:
خلونا نبدأ من الآخر، من عند الطموح اللي بيسعى له أي واحد فينا، وهو إنه يشتغل في Corporate أو شركة كبيرة ;) ... وهنا أنا هأحكي لكم عن تجربتي في واحدة من الشركات دي شركة YAT للتدريب، واحدة من أكبر شركات التدريب في مصر، واللي اشتغلت فيها "E-Marketing Instructor" وكانت إرادة ربنا سبحانه وتعالى إني أروح أشتغل في منحة وزارة الإتصالات +MCIT Egypt (حاجة تبع الحكومة يعني) وأشوف بقى بعيني ومحدش يقولي :D ... والله لو أحكي لكم على كم الروتين الموجود مش هأخلص xD يكفي إنك حاسس إنك بتتعامل والله مع موظفين حكومة بالظبط، ما بيصدقوا تيجي الساعة 5 عشان يهربوا من الشغل بسرعة -_- ما أعرفش في الشركة غير اللي بأتعامل معاهم تعامل مباشر، مفيش حد بيشيل حد في وقت زنقة، مفيش فرصة أصلا تقف تتكلم مع حد وتحاول تبني علاقة معاه :\ ... خلاصة اللي شوفته: إنت في الشركات الكبيرة غالبا هتفضل صغير ومش هتكبر، مش هتاخد مكانك ومش هتعمل أكتر من اللي مطلوب منك ومحدش هيعرفك ... ما يغركش اللي بتسمعه عن الشركات الكبيرة، والله العظيم معظمها أقرب ما تكون إلى الوظيفة الحكومية :3 (ما عدا Google طبعا ^_^ ) ... لو ناوي بجد تشتغل في Corporate ما تروحهاش غير وإنت كبير، دي نصيحتي ليك :)
ثانيا: الشركات الناشئة Startups:
مصر فيها كمية شركات ناشئة مش قليل بس يا ترى كام واحدة فيهم ناجحة وبتحقق أهدافها؟! :) ... عموما موضوع ال Startup هيبقى قدامك حالة من 2 ملهومش تالت:
- الحالة الأولى هي إنك تشتغل في Startup بتاعة حد، وبالتالي لازم تعرف الآتي:
إنك لازم تثبت للي إنت هتشتغل عنده إنك حريص على تحقيق حلمه، بتبذل أقصى ما عندك عشان تثبت له ده، وده طبعا يستلزم إنك تبقى عارف إنك هتتعب وهتيجي على نفسك كتير وإن العملية هتبقى محتاجة منك صبر ومؤازرة (يعني بالبلدي تسنده)، والله أفتكر جت علينا أيام كنا بنام باليومين والتلاتة في الشركة من كتر حبنا للشغل <3 ^_^ ... ولو ده حصل صدقني صاحب ال Startup هيشيلك في عنيه ويقدر تعبك، أنا والله شخصيا عملت كدة في Reny وأخدت فرصة ما يحلمش بيها أي واحد، أخدت مرتب ضعفين اللي بياخده أي حد Fresh وإتعملي Promotion لوظيفة Assistant Marketing Manager في أقل من 6 شهور شغل، والطبيعي إنك محتاج سنتين ع الأقل عشان توصل لل Position ده ... بس زي ما بيقولوا الحلو ما يكملش :( يمكن أكبر عيب أنا شخصيا قابلته في ال Startup اللي اشتغلت فيها هو
"العشم"، وللأسف ع الرغم من إنه مطلوب جدا في بداية أي Startup إلا إني
للأسف مكنتش فاهم ده :\
... ويمكن كتير منكم يعرف إني شخص عاطفي بتأثر جدا بالكلام سواء كان سلبي
أو إيجابي، وده طبعا أثر بشكل كبير على أدائي في الشركة، وخلاني وصلت
لمرحلة من كتر القيل والقال إني أعتذر عن إني أكمل رغم إني والله حققت
نجاخات كبيرة جدا في الشركة يكفي إن الصفحة بقت من أحسن 500 صفحة في مصر
على موقع Social Baker من ناحية ال Engagement، بفضل الله تعالى ^_^ ... لكن قدر الله وما شاء فعل، وسيبت الشركة :'( ..
حتى لما قررت للأسف إني أسيبهم، ما رضيتش أروح أشتغل في Corporate إلا إني إتعرض عليا شغلانات وPositions محترمة في شركات كبيرة جدا يمكن منهم Tabarak Holding واحدة من أكبر شركات التطوير العقاري في مصر ... إلا إني رفضت، وإخترت إني أكمل في دعم ال Startups في مصر، ويمكن آخر ناس باشتغل معاهم حاليا هما AwfarMarket، شايف إنهم مميزين جدا وبيعملوا حاجة مختلفة جدا وعندهم طموح مش طبيعي ما شاء الله، ربنا يكرمني وأكون عند حسن ظنهم ^_^
وخلاصة الكلام في الجزئية دي: نصيحة شخصية لما تبدأ ال Career Path بتاعك
ياريت تبدأه في Startup، صدقني هتاخد فرصة وPosition ما تحلمش بيه في أي
شركة كبيرة، بس خليك حريص في اختيار ال Startup اللي تحب تبدأ معاهم، شوف
شغلهم إعرف طموحهم وشوف حماس الناس اللي شغالين فيها عشان تبقى إنت كمان
عندك من الحماس اللي هيخليك تحب تكمل معاهم حلمهم وتصبر عليه :)
- الحالة التانية هي إنك تفكر تبدأ ال Startup بتاعتك:
إذا كنت شخص طموح ومش حابب تفضل طول عمرك موظف، هيجي لك يوم من الأيام وتفكر تفتح شركتك الخاصة في حاجة إنت حبيتها واشتغلت فيها، وهتبقى حاسس إنك بقى عندك من الخبرات والعلاقات اللي تقدر تبدأ بيها ... لو ده حصل وبجد ناوي تبدأ يبقى لازم تستنى المشاركة اللي جاية واللي هأخصصها عن تجربتي الشخصية في Et3allem, etfasa7 ... ولحاد ما أجهز المشاركة دي، ياريت تشوف ال Playlist دي هتكون مفيدة جدا ليك ;)
وعندك كمان كورس كامل تبع Udemy عامله Founder Institute بيشرح لك تفصيلا إيه اللي محتاجه عشان تبدأ شركتك
ها؟ ... نويت تبدأ ال Startup بتاعتك وتعيش حلمك؟ ولا هتشتغل في Startup موجودة وتبذل فيها أقصى ما عندك وتكبر فيها؟ ;) ... مستنى أسمع آرائكم وتعليقاتكم! :)
وعشان يبقى ختامه مسك! :) ... نيجي للمفاجأة بقى، أنا بأفكر بصراحة حالياً إني أبدأ ال Startup بتاعتي إن شاء الله في أقرب وقت ممكن :) ... بأفكر إن ال Startup بتاعتي تكون عبارة عن أول CoWorking Space في أسيوط، لكن عندي تخوف وقلقان من مدى نجاح الفكرة وصبر الناس عليها ومش عارف إذا كان فعلا الوقت مناسب ولا لأ! :\ ... وعشان كدة عملت ال Form الصغيرة دي وحابب إنكم تساعدوني فيها بآرائكم عشان أشوف هل آخد خطوة جدية في الموضوع ده ولا أستنى شوية: http://goo.gl/4qPnua
بس خلصت الحمد لله :D ... وأتمنى تكون المشاركة دي عجبتكم واستفدتم منها، وما تنسوش تملوا ال Form اللي فوق وتقولوا لأصحابكم عليها لإن إحنا محتاجين فعلا آرائكم عشان نشوف هناخد خطوة جدية في الموضوع ده ولا نستنى، وربنا يبارك لكم! :)
خليكم متابعين المشاركة الجاية بإذن الله هأحكي فيها تجربتي الشخصية في
تأسيس ال Startup بتاعتي، وما تنسوناش من صالح دعائكم، وخصوصا إني أتجوز
عشان أنا زهقت والله!! xD
تعليقات
إرسال تعليق