#أ_ب_تسويق_رقمي: (7) التسويق بالبريد الإلكتروني E-Mail Marketing
واحدة من أسهل وأنجح الطرق للوصول لعميل بعينه هي ال E-Mail Marketing، وعشان كده هي تعتبر نوع من أنواع التسويق المباشر "Direct Marketing" ... ويمكن في دراسة قريب كانت بتقول إن 75% من الموظفين ع مستوى العالم أول حاجة بيعملوها لما يروحوا الشغل، هي إنهم يفتحوا الإيميلات الخاصة بيهم ... ده كله ما يشجعكش إنك تستخدم الإيميل في شغل التسويق بتاعك؟! ;)
إيه المزايا من استخدام التسويق بالإيميل؟ ليه استخدمه يعني؟
في مزايا كتير تخليك تستخدم الإيميل كأداة أساسية في شغلك، يمكن أهمهم:
- Targeted: لإنها رايحة لعميل بعينه، بالإيميل الشخصي بتاعه
- Cost-Effective: ببلاش خالص لو إنت بيزنس ع قدك زي ما هنشوف بعد شوية
- Customizable: ممكن تعدل في الرسالة اللي هتتبعت بسهولة وتبعتها بأكتر من صيغة وهكذا
- Measurable: تقدر بسهولة تعرف كامواحد فتح الرسالة دي وداس ع اللينك فيها
طيب، إزاي نشتغلها بقى؟ وإيه التقنيات اللي محتاجها؟
هتحتاج Tool زي MailChimp (بيسموها E-Mail Service Provider)عشان تساعدك في إنك تبعت رسائل كتيرة بشكل إحترافي ومنظم ومجهود بسيط وببلاش خالص، وهيبقى مطلوب منك الآتي:
- Creating Lists: لازم الأول تجمع الإيميلات اللي إنت عاوز تبعت لهم، وأسهل طريقة للموضوع ده هي من خلال الموقع بتاعك، زي مثلا لما تقولهم سجلوا معانا في القائمة البريدية أو التسجيل العادي وتجمع فيه بياناتهم، أو من خلال مسابقات أو تحميل كتب أو غيره، الطرق كتيرة بس اللي لازم تتأكد منه إن العملاء هما اللي عاوزين يبعتوا لك إيميلاتهم :)
- Creating E-Mail Campaigns: بعدين هتبدأ تحدد الحملة التسويقية اللي إنت عاوزها مين ال List اللي هتبعت لها وهتبعت لها إمتى، وإيه اللي هيتبعت لها بالظبط
إزاي بقى أجهز الرسالة اللي عاوز أبعتها في ال Campaign بتاعتي؟
بعد ما جهزت ال List بتاعتك وجمعت الإيميلات اللي عاوز تبعتها، فاضل بس إنك تجهز الرسالة نفسها ... والرسالة بتكون عبارة عن صفحة ويب عادية مكتوبة ب HTML, CSS ويا إما تكتبها إنت بنفسك، أو تستخدم ال Templates الجاهزة اللي بتقدمهالك ال Tools وتعدل فيها زي ما انت عاوز
ممتاز، إيه بقى محتويات الرسالة اللي هأبعتها؟
أي رسالة هتبعتها بيبقى ليها شوية قواعد ومحتوى كدة لازم تلتزم بيه:
- Subject Line: وزي ما بيقولوا: "الجواب بيبان من عنوانه" فلازم تعتني جدا بعنوان الرسالة عشان يشد انتباه اللي هيقراها، مثلا عنوان زي ده "ال Startups علينا حق!" أكيد أحسن من "تعلم كيف يمكنك إنشاء شركتك الخاصة" -_- ... كمان في حاجات ما ينفعش تكتبها في العنوان زي كلمة FREE والحروف ال Capital وشوية رموز زي #@!!%؟ وغيرهم ممكن ترجع لل E-Mail Client (زي GMail) عشان تعرف التفاصيل دي
- Header: وده اللي فيه To ودي اللي هنبعت له ولازم يحس انك باعت له هو بس ... وفيها From وهنا الإيميل المبعوت لازم يكون بالدومين بتاع الشركة، مثلا mustafa@et3allem.org
- Personalized Greetings: وهنا بتلاقيها في أول كل رسالة Dear Mr. Ahmed ولازم تضيف اسمه عشان يحس إنها مبعوته ليه، وتقدر تسحب الاسم ده من ال List اللي عملتها في MailChimp
- Body: الرسالة نفسها وهنا بقى لازم يكون المحتوى متميز ويشد القارئ، وأهم حاجة تعملها هنا إنك تضيف زرار Call To Action "CTA" واللي بيوضح إنت عاوز المستخدم يطلع بإيه من رسالتك، زي مثلا لما تويتر بيبعت لك رسالة تأكيد بيبقى فيه زرار لبني بتدوس عليه حتى من غير ما تفهم، مش كدة؟! ;)
- Footer: وهنا تضيف ال Contacts بتاعتك ومواقع ال Social Media الخاصة بيك ... كمان يفضل تضيف Unsubscribe Link عشان اللي مش حابب يتابع رسايلك تاني، دي بتوضح للعملاء بتوعك إنك بتحترمهم :)
ده بس اللي محتاج إنك تكون عارفه في مجال ال E-Mail Marketing وخدوا بالكم المجال فيه تفاصيل كتيرة مش هنقدر نغطيها في مشاركة واحدة أبدا ... أتمنى ده بس ياخد بإيديك لبداية طريقك، وما تنسوناش من دعائكم ^_^
تعليقات
إرسال تعليق