في أقل من 10 أيام، بفضل الله تعالى، إتعلمت أصول المهنة! :D ... وإتعلمت إن فيه مجموعة "ملفات" لازم تكون مع أي حد عاوز ينظم شغله ع السوشيال ميديا ... وهأستعرضهم معاكم بشوية تفصيل في التدوينة دي، هطول عليكم معلش بس إن شاء الله تستفيدوا منها، يللا نبدأ :)
- الخطة السنوية (Yearly Plan)
- لازم يكون عندك ملف موضح فيه خطة الشغل بتاعك طول السنة اللي إنت شغال فيها، ولازم طبعا تكون مجهز الملف ده قبل ما السنة تبدأ من أساسه ... هتقولي: "طيب وأنا هأعرف منين اللي هيحصل السنة الجاية؟" هأقولك: "الموضوع أبسط من كدة، إنت محتاج بس تحط خطوط عريضة لشغلك مش أكتر" ... يعني مثلا إنت عارف إن كل سنة في أحداث مهمة بتتكرر، زي رمضان والأعياد وشم النسيم وعيد الحب ... إلخ، لازم تاخد دول في حساباتك وإنت شغال ... مش بس الموضوع ليه علاقة بالأحداث، لا إنت برده لازم تكون محدد أهدافك ونوعية المتابعين بتوعك وغيره ... ودي قايمة بأهم العناصر اللي لازم تكون موجودة في الملف ده:
- تعريف عام للشركة Brand Identification
- الأهداف Goals & Objectives
- المنافسة Competition
- الفئة المستهدفة Target Audience
- التواصل Communication
- طريقة التواصل Communication Method
- وسائل التواصل Communication Channels
- الاستراتيجية Strategy
- استراتيجية المحتوى Content Strategy
- استراتيجية إدارة الحسابات Media Management Strategy
- أفكار جذب المتابعين Engagement Ideas
- اللي يتعمل واللي ما يتعملش Do's & Don'ts
- إدارة الأزمات Crisis Management
- الخطة الشهرية/ الأسبوعية (Editorial Calendar)
- ودي بقى المشاركات الفعلية اللي بتنزلها ع الحسابات المختلفة بتاعتك ع السوشيال ميديا، ويفضل تعمل لكل حساب الخطة بتاعته ... وتقدر تعملها لمدة أسبوع، أو أسبوعين أو شهر، لكني أفضل تعملها كل أسبوع عشان ممكن تحصل أحداث خلال الأسبوع تلخبط لك الخطة اللي إنت حطيتها كلها ... ومش عاوز أنسى أأكد عليكم إن لازم الخطة تبقى مرنة وقابلة للتغيير على حسب الأحداث اللي بتحصل، لإن ده هيقنع الناس باللي إنت بتقدمه أكتر ... والكلام في الجزئية دي كبير ومش هيخلص فهأبقى أنزله في بوست تانية لوحدها إن شاء الله.
- الأسئلة الشائعة (FAQ)
- ودي مجموعة أسئلة وإجابتها، تقدر تتوقعها مع بداية السنة، أو إنك تلاقي إن ناس كتير بيسألوا عليها فلازم تضيفها معاهم ... ويمكن أكبر فايدة للجزئية دي، إنك تقدر تساعد المتابعين بتوعك والناس اللي بيديروا الحسابات معاك كمان إنهم يعرفوا إجابات للأسئلة المتكررة ... كمان يفضل تعمل ملف لكل حساب لوحده.
- المشاكل والاستفسارات (Inquiries & Complains)
- أكيد المتابعين بتوعك عندهم أسئلة محتاجين ليها إجابة، وأكيد ممكن تواجههم مشاكل مع استخدام منتجاتك أوخدماتك ... لازم بقى تجمع كل المشاكل والاستفسارات دي في ملف واحد وتحاول تجاوب على اللي تقدر منه وتتناقش مع فريقك في اللي مش عارف ليه إجابة ... كمان الملف ده هيكون مفيد ليك عشان تشوف بتحقق الأهداف اللي بتسعى ليها ولا بتبعد عنها.
- التقارير (Reports)
- مهم جدا يكون عندك تقارير أسبوعية / شهرية عن الشغل بتاعك، تقدر من خلالهم تحسب ال ROI وال KPI وتقيم أدائك على شبكات التواصل الاجتماعي ومدى قربك من تحقيق أهدافك ... وطبعا التقارير دي تقدر تجيبها من الحساب نفسه أو باستخدام أدوات التحليل والتقارير، ودي ليها تفصيل كبير هنتعرض ليه بعدين إن شاء الله.
- فكرة عامة عن الشركة (Portfolio)
- آخر ملف محتاجه يكون معاك هو اللي فيه تفصيل عن كل المعلومات اللي محتاج أعرفها عن الشركة اللي أنا ماسك شغل التسويق بتاعها سواء كانت شركتي أو شركة تانية ... وهنا محتاج تعرف أدق التفاصيل، لإنك هتتعرض لأسئلة كتير فإن ما كنتش مكون خلفية كويسة عن الموضوع، أكيد مش هتقدر
يعني حاولت في التدوينة دي إني أكلمكم عن مجموعة الملفات أو ال "Documents" اللي هتحتاجها عشان تنظم شغلك في السوشيال ميديا ... وهي مجرد تجربة شخصية، يعني الموضوع أكيد في كلام تاني، فياريت اللي يعرف حاجة تاني ناقصة يضيفها لنا، ويبقى كتر خيره :)
تعليقات
إرسال تعليق