أنا عارف إن أكيد في ناس كتير تقدر تتكلم أحسن مني في الموضوع ده ... لكن التدوينة المرة دي عن تجربة شخصية في تجربة فريدة من نوعها بالنسبة لي في إني أعمل Digital Marketing Plan لمنتجات أول مرة في حياتي أتعامل معاها، علمتني إزاي إن ال Marketer لازم يكون شاطر ويعرف يتعامل مع أي منتج وأي خدمة أيا كان نوعهم ...
وأنا النهاردة مش جاي أكلمكم عن الناتج بتاع الخطط دي أو عن الأسلوب العلمي للموضوع ده، لكن جاي أكلمكم عن الخطوات اللي أنا مشيت عليها واللي بفضل الله تعالى كانت نتيجتها خطة تسويقية رائعة، واللي أنا شايف، والله المستعان، إنها مناسبة لأي منتج أو خدمة محتاج تسوق لها، وأتمنى تفيدكم وتساعدكم إنكم تعملوا خطة رائعة بإذن الله :) ...
مسكت القلم وحاولت أكتب شكل ال Plan ... لقيت نفسي أصلا محتاج Plan عشان أعرف أعمل ال Plan اللي مطلوبة مني :D ... بجد والله!!، إنت محتاج تحط لنفسك خطة تمشي عليها في شغلك ... تعالوا نبدأ:
- غير منطقي بالمرة، إنك هتعمل خطة تسويقية لشركة معينة من غير ما تكون عندك خلفية كويسة جدا عن كل منتجات وخدمات الشركة ... وعشان تقدر توصل لكل المعلومات دي، في طرق كتير: شوف ال Website بتاعهم ... تابع شغلهم ع ال Social Media ... أو حتى ممكن تزورهم في الشركة وتعمل معاهم Meeting لمدة ساعة مثلا تعرف فيه كل اللي إنت محتاج تعرفه عن الشركة وخدماتها.
2 - Target Audience
- برده لازم تبقى عارف الشريحة اللي بتتعامل معاها من الناس، هل المنتج جورنال مثلا فبيخاطب الناس كلهم؟، ولا سناكس للأطفال بس؟، ولا إكسسوارات وأدوات تجميل للستات والبنات؟! ... لازم تسأل وتعرف مين اللي مهتم بمتابعة أخبار الشركة اللي إنت بتعمل لها الخطة دي ... وممكن برده من خلال ال Brand Identification توصل لنوعية الناس دول.
3 - Competitors
- محتاج برده تكون خلفية كويسة عن المنافسين للشركة اللي إنت بتعمل لها الخطة، لسببين: تستفيد من خبراتهم وتعرف بيفكروا إزاي، وتاني حاجة ما تعملش حاجة شبههم عشان ما يقولوش الفكرة مسروقة.
4 - Time
- الوقت مهم جداااااااا للخطة التسويقية بتاعتك ... يعني مثلا كمان أسبوع ويهل علينا شهر رمضان، كل سنة وإنتم طيبين :) ... وأكيد شهر رمضان ليه طبيعة مختلقة عن باقي السنة، وكمان طريقة عرض المنتجات والخدمات فيه مختلفة عن أي وقت تاني في السنة، فلازم تراعي الجزئية دي كويس.
- دي آخر مرحلة في الخطة بتاعتك، وهي إنك تبدأ تحط التصور بتاعك ... ويمكن أسهل طريقة تساعدك في الجزئية دي هي عملية ال Brainstorming، وهي ببساطة إن أي فكرة تيجي في دماغك إكتبها، حتى لو شايف دلوقتي إن ملهاش لازمة، مش مهم إكتبها ... وبالتالي إنت محتاج تكون متابع إيه الأفكار الجديدة في التسويق بشكل عام وفي مجال التسويق الرقمي بشكل خاص ... وبعدين حاول ترتب الأفكار دي وتنظمها عشان تطلع بمجموعة أفكار تبني عليها الخطة بتاعتك :)
وكتدريب ليكم ع الكلام ده ... عاوزكم تعملوا Digital Marketing Plan لشركة منتجات "تمور" في رمضان :)
أتمنى تكون التدوينة عجبتكم، وإستنوا ليها جزء تاني هأنزله قريب هأحكي فيه منتجات بعينها وإزاي فكرت لها في الخطة بتاعتها ...
ما تنسونيش من دعائكم، وتابعوا المدونة بشكل دايم عشان تعرفوا كل جديد :)
ما تنسونيش من دعائكم، وتابعوا المدونة بشكل دايم عشان تعرفوا كل جديد :)
تعليقات
إرسال تعليق